خمس شهور من علاج الروكتان / FIVE MONTHS OF RACTAN
السلام عليكم ورحمه الله وبركاته
اخيرا نشرت التدوينه اللي كل البنات يطلبونها من يوم ماقلت اني اعالج بشرتي بالروكتان ، راح احكي كل شي بالتفصيل ليش طلع لي حب الشباب ،بايش عالجته قبل الروكتان ، وليش قررت اعلاجها بروكتان ، ومضاره ومنافعه ، والعنايه بالبشره خلال العلاج وبعد العلاج ، يعني حرفيا راح احكي بكل شي لانه اغلب تدوينات البلوقر كانت فقيره المعلومات ، ماكانت توضح التفاصيل يعني كيف اعتني فيها ، هل عادي استخدم اله كلارسونك ، او حتـى طبيعي بشرتك مع العلاج تصير جافه بس محد ذكر وش نوع المرطب اللي استخدمه خلال العلاج !! مرطب للبشره الجافه او مرطبك القديم اللي ع نوع بشرتك الاساسي ، سامحوني اذا بطول عليكم بس بحاول اغطي كل الجهات عشان اللي حابه تعالج بشرتها بالروكتان تكون عندها خلفيه كافيه ووافيه .
سبب ظهور حب الشباب والبثور بشكل عام ؟؟
سبب ظهور حب الشباب والبثور بشكل عام ؟؟
بشكل عام لها ٣ اسباب وتختلف من شخص لشخص حسب طبيعه بشرته وجسمه :
- أسباب جسمانية
- أسباب نفسية
- أسباب غذائية
وفي حالتي انا وكثير من البنات كان السبب لا جسدي ولا نفسي ولاغذائي كان السلوك الخاطىء هو اللي عدم بشرتي ، طول عمري ماكان تطلع لي ولا حبه ، لا في المتوسط ولا في الثانوي ، بس دخلت تحضيري بديت اللعب بنفسي ، ومن الاسباب اللي نتعرض لها يوميا وتهيء ظهور حب الشباب :
- اول سبب الشمس واني ماكنت احط واقي ، الشمس تسبب في فقدان الكلوجين وتسبب تصبغات والحبوب الصغيره اللي تحت الجلد .
- ثاني سبب الميك اب الميك الميك اب هذا دمار البشره اذا مانظفتي وجهك منه ، وانا كنت احسب مناديل المزيله للميك اب تنظف وتكفيني طلع العكس هذي المناديل كارثههههه ع وجهك ، لانها توحيلك انها شالت الميك اب من وجهك وفي الحقيقه ماشالت الا الطبقه الاولى بس ، وباقي الميك اب موجود بالطبقات بشرتك ويسدلك المسام ويكتم لك وجهك .
- ازاله وبر الوجهه بطريقه غير صحيه وعدم تهيئه البشره قبل وبعد، وهذي من الاسباب الرائسيه اللي سببتلي المشكله ، يعني قبل مفروض تكون الادوات معقمه اذا اله او شمع او شيفره ، وبعده بتكون البشره حساسه ومتهيجه شويه لازم نعتني فيها لمده يومين ع الاقل مع عدم التعرض لشمس (انا من اول مره شلت وبر وجهي بدت تطلع لي الحبوب بسبب اهمالي لهذي النقطه)
- ماكنت اشرب مويه كثير ولا ارطب وجهي بالشكل الكافي وبكذا البشره تفقد مرونتها وتقلل من سرعه تجديد الخلايا .
ومع هذي الاسباب كلها بديت اعاني من بشرتي حبوب مسام كبيره وتصبغات واثار الحبوب والخ...ثلاث سنوات جلست اعالج بشرتي عند دكتورتين اول وحده كل ماشافتني قالت تقشير كميائي يمكن سويت فوق الخمس تقشيرات وبطلت اروحلها لاني ماشفت اي تقدم .
والدكتوره الثانيه اعطتني كريمات فادتني بنسبه 60 بالميه بس الحبوب كانت تروح وترجع وتبقي اثر حتى لو مالعبت فيها وقالت انه لازم اتبع نظام صحي معين دام نوع بشرتي دهني ابعد عن الكافيين السبايسي والدهون واتبعت النظام غذائي معين ، بس ماكنت اشوف النتيجه اللي ابيها فتكلمت معها اني ابي اخذ الروكتان وفي البدايه كانت الدكتوره معارضه لانه حالتي ماتحتاج اخذ روكتان ، بس في نهايه الموضوع رضيت انها تعطيني الروكتان
اول شي شرحتلي الروكتان : عباره عن علاج لمرضى حب الشباب الشديد والذين لم يستجيبوا لعلاجات اخرئ ، ويقوم بالحد من انتاج الدهون في البشره ، والحد من تراكم الدهون تحت الجلد مما يقلل الاصابه بالبكتريا المسببه للحب او البثور، وتقوم بتسريع بناء خلايا البشره مما ينهي مشكله التصبغات السطحيه .
بس له اضرار كثيره ولازم تاخذينه تحت اشراف طبيب لانه من الممكن ان يؤدي لتشوه الجنين او الاجهاض ،او لفشل كلوي ،او التهابات بالكبد ،او حتى الاكتاءب الشديد والوفات .
الدكتوره وقعتني ع ورقه انها شرحت لي مضار الروكتان واني أعي كليا خطوره العلاج ، وطلبت مني اسوي تحاليل دم ل SGPT و CHOLET و TRIGLE ، واذا كنتي متزوجه راح تسويلك تحليل حمل ، لانه ممنوع كليا انك تاخذينه وانتي حامل ، ولازم سنه كامله بعد العلاج ماتحملين فيها ، لان العلاج يكون بدمك ولازم له سنه لين يطلع تماما من جسمك ، ويالنسبه للي ترضع نفس الحكايه ، والمصابين بامراض الكبد او عندك ارتفاع بمستوى فايتمن A ، او مستوى عالي من الكولسترول او الجليسريدات الثلاثيه ممنوع من الروكتان لين يتم علاج المرضك اول .
حللت والحمدالله كل شي سليم ووصفت لي الدكتوره جرعه 20mg كبدايه (العلاج ينصرف حسب وزن المريض وبمعادله معينه يطلع عدد الجرعات ونسبتها)
بدايه العلاج والاعراض الجانبيه والمحظورات
زي منتو شايفين الحبه مرره صغيره يختلف حجمها باختلاف الجرعه يعني ال30mg اكبر بشوي وكذا.... مالها رائحه ولا طعم ، يفضل انك تاخذينها بنفس الوقت يوميا بعد وجبه رئيسيه عشان تمتصه المعده باكبر شكل ممكن ، وخلي العلاج بعيد عن اشعه الشمس ولا تخلينه في مكان حار او بالثلاجه ، المكان الافضل درج غرفتك .
خلال فتره العلاج راح يزداد حب الشباب بشكل سيء ، لاتخافين هذي من وظايف العلاج وبعدها راح يتحسن كل شي ، يمكن يوصف لك الدكتور كريمات او أدوية عشان يخفف من احمرارها (انا ماوصفت لي).
اهم شي انك تستمرين ع العلاج بشكل منتظم لانه يعمل ع رفع مستوى ماده الايزوتريتنون بالدم ، يعني تخيلي انه زي الاسهم اذا اخذتيه بشكل منتظم يوميا راح يرتفع السهم للنقطه المطلوبه ، بس اذا لعبتي واخذتيه يوم ويوم لا ، ماراح تستفدين شي ابدا بالعكس راح تضرين نفسك ، وفي حال انك نسيتي العلاج اليوم لا تاكلين حبتين في اليوم الي بعده كذا غلط .
كل شهر راح تاخذين علبه من ٣٠ حبه وبس تخلص تسوين التحليلات المطلوبه وتراجعين الدكتوره عشان تتاكد من سلامه الكبد والكلى والكوليسترول ، واذا كنتي سليمه تكملون الشهر اللي بعده وكذا الحاله لين تخلصين العلاج.
من أعراضه الجانبيه خلال فتره العلاج (مو لازم تجيك كلها):
- جفاف الجلد و الشفاه بشكل فضيع يعني مافيه شي ماجربته حتى الفازلين صرت اتروش فيه .
- زيادة الحساسية والحروق من الشمس .
- تقشر الجلد في راحة اليدين و أخمص القدمين او اكزيما.
- ترقق بصيلات الشعر وسقوط الشعر بسبب الجفاف الشديد .
- جفاف العينين ومنوع كليا انك تلبسين عدسات لاصقه.
- نزيف في الأنف و اللثة أحياناً .
- ألم في العضلات وكثير يلخبطون ويحسبون الالم بالعظام .
- إرتفاع الكوليسترول وإنزيمات الكبد في الدم ، عشان كذا لازم تحليل كل ٣٠ يوم لاتاكد من سلامتك .
- الصداع، الغثيان، التقيؤ .
- الاكتئاب أو التغيرات المزاجية المفاجئة كالحزن أو الغضب .
- الشعور بالتعب الغير اعتيادي، أو انعدام الشهية .
- ألم حاد في المعدة، الإسهال، أو نزيف في المستقيم .
- اصفرار البشرة و العينان أو البول بلون أصفر داكن .
ومن الممنوعات اللي لازم تتجنبينها خلال فتره العلاج وبعده لمده لا تقل عن ٦شهور لسنه :
- الحمل والرضاعه كليا لمده سنه كامله بعد العلاج.
- التبرع بالدم خلال لتناولك الروكتان ولمده ٦ شهور بعد العلاج.
- لانسوين أي ليزر أو تقشير للبشرة تماماً أو أي إجراء تجميلي طوال فترة تناولك الروكتان , يمديك فقط بعد 6 شهور على الأقل بعد التوقف عن الروكتان .
- ممنوع استخدام الشمع والحلاوه لازاله الشعر لان البشره تكون حساسه وجافه ومتهيجه فبكذا انتي تسلخينه حرفيا.
- ممنوع تناول اي نوع من انواع الفايتيمين
- ممنوع تناول مضاده حيويه قبل استشارتك للطبيب لانه بعض المضاده مثل Tetracyclines تزيد بصورة كبيرة من الآثار الجانبية النادرة للروكتان .
- استخدام العدسات الاصقه
- التعرض لشمس بشكل مباشر او اله التسمير
------------------------------------------------------------------------------------------------------------------
كل اللي فوق كان تعريف بالروكتان واثاره الجانبيه ، الحين نجي لتجربتي معه
اول شهر اخذته كانت الجرعه 20mg ماحسيت بالجفاف الا بنهايه الشهر وجفاف بسيط في بشرتي ، كنت استخدم كريم qv لجسمي واحيانا احطه لوجهي عشان يخفف من الجفاف ، واكثر منطقتين اصيبوا بالجفاف وبسرعه هم عيوني وشفايفي بس كنت متداركه الموضوع كنت اقطر عيوني قبل وبعد النوم وشفايفي ارطبها اكثر بشوي ، بالنسبه للحبوب والمسام زادوا بنسبه 40 بالميه ماكنوا يعوروني ، وكان مسموح لي استخدم الميك اب بس اهم شي احط واقي اذا بطلع للشمس وانظفها تمامممماااا اذا جيت بنام .
ثاني شهر نفس الجرعه ، ومن الاعراض الحانبيه بس الجفاف اللي صابني ، زادت الحبوب وبشكل مقزز ماكنت اقدر احط ميك اب لانها كانت تعورني وقت التنظيف، كانت الدكتوره واصفتلي بس غسول اللي انا متعوده عليه من سنتين تقريبا، وقالت لي ماا استخدم اي شي يقشر البشره زي اله الكلارسونك واولي او اي فرشه تستخدم لتقشير و صنفره البشره ، لان البشره متهيجه لازم نتعامل بلطف معها وصرفت لي سفنجه استخدمها بدل اله الكلارسونك (رفيو الاسفنجه بالانستقرام)
ثالث شهر زادت الجرعه ل30mg زاد الجفاف بشكل كبير ، عيوني صارت تعورني لدرجه احيانا اقوم من النوم احس فيه سكاكين جواتها ، خشمي ناشف ومجرح ، بشرتي انعدمت من الجفاف وصابني اكزيميا برجولي يديني برقبتي ، وشعري ناشف ناشف ناشف الحمدالله اني كنت مستعده من ناحيه ماسكات الشعر ، واكثر شي تازمت منه وتازموا اهلي منه الحاله النفسيه اللي كنت فيها ، ااااهههه ياربي كان بدايت اكتاءب .
رابع شهر نفس الجرعه ، ونفس الاعراض ، بس الاكزيميا عالجتها الحمدالله ، استخدمه qv لوشين فازلين بالكاكو ، كل كريمات بودي شوب ولوكستيان واخر شي الفازلين العادي ، كلهم كلهم كانوا يخلصون خلال اسبوعين ، اروش نفسي بالمرطبات ٣ مرات او ٤ ، عشان مترجع لي الاكزيميا ، الحبوب بدت تهداء المسام بدت تصغر والبقع بدت تتخف ، بس النفسيه صارت من سيء لاسوء ، كنت ماابي اطلع من البيت ماابي اشوف احد ، ولاحتى اهلي ، ازعل واتوتر ع اقل شي ، كنت ابكي ودخل بحاله حزن شديد بس عشان كذا شي في مخي اتخيله .
خامس شهر زادت الجرعه ل40mg ، هنا انا انتهيت نفسيا جسديا ، النفسيه كانت بالقاع رسميا لدرجه امي قررت تكلم الدكتوره ان توقف العلاج لاني كنت اخوفهم بثانيه اكون بكامل سعادتي وبالثانيه اللي بعدها كاني في عزاء، بس جات من ربي ، بديت احس بنغزات بجنبي والم فضيع بظهري وفخوذي، لدرجه ماكنت اقدر اقوم ، ع طول رحت حللت عند مستشفى ثاني وطلب الدكتور تحليل بول مو دم وهذي او مره اسويه من يومم بديت العلاج ، يقول تحليل البول يبين الالتهابات وبدايات المرض ، ام الدم مايبين الا الحالات المتقدمه جدا من المرض ، المهم طلع عندي التهاب في البول فطلب مني اوقف الروكتان واخذ مضاد حيوي لانه يتعارض مع الروكتان ، فوقفت العلاج وجلست اسبوعين اتعالج من الالتهاب ، وبعدها جلست اسبوعين تقريبا ورجعت لهم ، حولني لدكتور بشره وقال دامك وقفتي نزل معدل ماده الايزوتريتنون بدمي ، فقال راح اوصف لك كريم واذا ماتحسنتي بنرجع ناخذ الكورس من اول وجديد من الصفر بس بعد 6 اسابيع .
حاليا انا مرتاحه بدونه ورجعت زي زمان نفسيتي شعري بشرتي وحتى شفايفي ، ومن ناحيه الحبوب الحمدالله احس خفت بنسبه 95 بالميه زي منو شايفين بالصوره ، بس باقي الاثر ،وكان من المفترض انه يروح مع انتهاء ٦ شهر بس ربي ماكتب اني اكمله.
-----------------------------------------------------------------------------------------------------------------
بالنسبه للعنايه خلال وبعد العلاج يتقاربون من بعض
العنايه خلال علاج الروكتان
اول شي واهم شي المويه المويه المويه حقيقي العلاج ينشف اعضاءك كلها الداخليه والخارجيه ، فلازم تشربين اقل شي 10 اكواب كبيره من المويه ، كنت منطمه نفسي كل بعد وقبل صلاه كاسه مويه وبكذا مايجي العشاء الا وانا مخلصه ال10 كاسات.
تاكلين مرره كويس وتعوضين جسمك عن ناقص الفايتمين لانك ممنوعه تاكلين اي نوع من حبوب الفايتمين .
سوي رياضه لان الرياضه لها مفعول ضد الاكتاءب .
تحطين ميك اب او لا ، لازم غسول مناسب لنوع بشرتك قبل الروكتان لان بعد الروكتان بشرتك بتكون جافه رقم 1 بالصوره مره انصح فيه صحبات البشره الدهنيه والمختلطه liquid soap من newderma .
بعد الغسول اذا تحطين ميك اب لازم تستخدمين تونر ، واذا لا ، زي حالتي انتقلي ع طول للمرطب هذا المرطب صمد معي طول فتره العلاج رقم 2 بالصوره ، خالي من الزيوت لانه زي ماقلت بشرتي دهنيه ، بس ماكنت احس بالترطيب العميق فقررت اجيب ماسك للبشره الجافه ،بما انه تحولت بشرتي من الدهنيه للجافه ، بس حطيته ع بشرتي من اول مرره طلعت لي حبوب، وماكنت شايله هم لان كنت ماكله الروكتان ، وماجا في بالي واحد بالميه انه يمكن تكون من الماسك توقعت انها من الروكتان ، المهم وثاني مرره استخدمه صارت نفس الحكايه وفي ثالث مرره بعد ، فرحت لدكتوره اسالها وش استخدم مرطب قالت : استخدمي حسب نوع بشرتك قبل العلاج فقططط !!!! .
بعدها واهم شي حطي الواقي رقم 3 بالصوره ، حتى لو انك بالبيت لانه اشعه الشمس اللي تدخل من الشباك يمكن تسبب لك حرقات وتصبغات ، لانه خلقه بشرتك بذي الفتره حساسه جدا .
قشري شفايفك مرتين لثلاث مرات يومين ، يتقولين كثير !!! ياحبيبي شفايفك بتصير سودا من الجفاف والقشر خلقه هذا افضل مقشر طبيعي من لش رقم 4 بالصوره.
رطبي شفايفك مررره كويس فوق ال٥ مرات يوميا ، هذا المرطب من نيفيا مع واقي شمس رقم 5 بالصوره ، ترطيبه فضيع ، بس مشكلته انه يسوي طبقه بيضاء يعني لازم روج فوقه ولا بتطلعين كانك شاربه لبن .
اهم شي قطرات العيون رقم 6 بالصوره ، لانه عيونك اكثر عضو راح يصاب بالجفاف واسرعهم بالاصابه ، واللهي شعور السكاكين لو انسى اقطرهم الصبح او المساء ، جربت كذا قطره بس هذي اكثر وحده كويسه systane ulta ud .
واخر شي جسمك جسمك جسمك رطبي كل خليه فيه ، وانصحك بالفازلين ع طول .
العنايه بعد علاج الروكتان
امشي ع نفس النظام الغسول والتونر والمرطب والواقي ، وحاولي تبتعدين عن الاسباب اللي سببتلك الحبوب من الاساس ، يعني لا تنامين وانتي فيك ميك اب ، او بس منظفه وجهك بالمناديل فقط !!! لا نظفيه كليا من غسول مزيل للمكياج لمنطف للبشره ولاخر شي التونر .
حاولي تنتبهين لنوع كريماتك او المكياج اذا هو مناسب للنوع بشرتك ، او اذا هو منتهي الصلاحيه ، او اذا هو اصليي او لا .
المويه المويه المويه لا تتركينها ، لانها هي اللي تعالج بشرتك وتخليها صحيه وتخفي الحبوب الصغيره اللي تحت الجلد .
كولي فايتمين خاص بالبشره ، يعزز نظارتها وصحتها.
لاتسوين اي تقشير او اي نوع من انوع الليزر الا بعد ٦ شهور من العلاج جسمك ووجهك .
