CC Concealers from Avon / اصابع الكونسيلر من افون
السلام عليكم ورحمه الله وبركاته
تدوينه اليوم عن تصحيح الالوان و التصبغات بالبشرة باستخدام CC Concealers من افون ، اخترتها لانه سعرها بخيس جدا ،بس اول لازم تعرفين الالوان لايش تستخدم .
اذا كنتي تعانين من احمرار (مثلا تو انحرقت جبهتك بالويفي، دايم تصير لي ، او مثلا تو حبه بتطلعلك تكون المنطقه حمره ، او وحمه او اي بقعه حمره عندك في وجهك او جسمك ) استخدمي عليها مصحح لونه اخضر لانه الاحمر مع الاخضر يعطي لون نيود .
واذا كانت عندك بقع صفره في وجهك خاصه تجي بعد مايكون فيه كدمه او عمليه يكون لون مناطق موف غامق لدرجته نشوفه بني او اسود بس الاصل هو موف غامق جدا و مناطق تكون صفرا بالنسبه للاصفر اللون المعاكس له او اللي يصححها هو اللون الليلكي او افتح افتح درجات الموف ، اذا اجتمعوا اللونين يعطوتك اللون النيود وهذا المطلوب .
بالنسبه للمناطق اللي تكون فيها كدمات موف او الهالات تحت العين هي بالاساس موف (وهذي الشي درسته لما كنت ادرس ميك اب ب London college ) عشان نصححها نحط درجات الاورنج من افتحها لاغمقها حسب الحاجه ، يعني اذا هالاتك بسيط مو تروحين تحطين مصحح اورنج غامق لا حطي اورنج فاتح او بيتشي اللي هو المشمشي لانه يلغي للون الموف الفاتحه وكل مازاد غمق الهاله او الكدمه كل ماغمقنا الكوركتر .
بقول شي بعد اذا عندك حبه بارزه مستحيل مستحيل يختفي بروزها بالميك اب لا هي ولا الندبات ، الميك اب بس يصحح اللون لا اكثر ولا اقل ، اذا تبين الميك اب يطلع حلو اهتمي بشرتك اولا .
نجي للاصابع الكونسيلر هذي من افون ، الاصابع سهله الاستخدام كريميه بالنسبه وللدمج تندمج بسهوله ، الوانها شبه واضحها ما سطلع نفس اللون اللي تشوفينه بالقلم لا يطلع افتح بدرجتين ، يعني اللي تعاني من بقع او حبوب شبه فاتحها ومتوسطه بيناسبها ام الغامقه ماراح يفيد معها لان الدرجات ماراح تصحح هذا الغمق في اللون ، الفنشنق حقهم بودري ، حسيتهم البديل الارخص لاصابع سماشبوكس المصححه (بس سماشبوكس تقدرين تستخدمينها مبلله وهذي لا ) ، مالها اي ريحه يعني مناسبه للبشره الجافه .
بالنسبه للبكنق جبيته جده لانه سهل بلاستخدام وماياخذ مساحه بالشنطه او تسريحه مو زي البالت ، احيانا تشترين بالت كامل بس عشان مصصح واحد وياخذ مساحه وفلوس ع الفاضي ، ماتجي معه برايه وكل لون ينباع لوحده بعلبه .
الاصفر اكثر لون استخدمته لتنوير ، خاصه هو اكثر لون لايق علينا احنا الخليجيات ، ابتعدوا عن اي لون فيه بنكي او ع بياض بيقلب رمادي ، خوذي ع اصفر ونوري فيه واذا محتاجه تصحيح تحت العين او اي منطقه ثانيه صححي اول بعدين اخر خطوه استخدمي القلم الاصفر للتنوير ، الاخضر بعد استخدمه اذا فيه حبه لونها احمر او وحمه ع حمار او بكي القلم الاحضر يصححها ، او صححي بشرتك بعد البرايمر بعدين استخدمي الفونديشن والكونسييلر اذا محتاجه ، استخدمتهم بوحده من الفديو اللي نزلت باليوتيوب هنا .
سعره اقل من ٣٠ ريال للقلم الواحد ، تقدرين تشترينه من تطبيق AVON .
