مقارنه بين الة الكلارسونك و اله اولاي / Clarisonic vs Olay
السلام عليكم ورحمه الله وبركاته
بتكلم عن الفرق بين الة الكلارسونك واله اولاي وايش افضل من اي ناحيه واسعار كل وحده وكل التفاصيل ، لانها صارت شي اساسي في تنظيف البشرة ، بس لكثرة الالة وتنوع ماركاتها صار الواحد يحتار وش الافضل لنوع بشرته ومزانيته.
اولا الالة انصح فيها البنات اللي يحطون ميك اب يوميا حتى لو انه بس بيبي او سيسي كريم او مو شرط اساس تغطيته ثقيله ، لانه بقايا الميك اب تحت الجلد وفي المسام ماتنظفها لا مناديل مزيله للميك اب او غسول ، تحتاج تنظيف عميق ، عشان ماتسبب لك حبوب وتسد المسام وتصير عندك رؤس سودا وتبقعات ، وتحسن من منطر المكياج لانها تشيل طبقات الجلد الميت فيطلع لوك الميك اب نظيف (دايم يقلولك نظيف بشرتك قبل الميك اب ) .
او البنت اللي حابه تعزز روتين عنايتها اليومي ، لانه التقشير بشكل منتظم يجدد الخلايا ويساهم في امتصاص يشكل كبير العلاجات الكريميه او منتجات العنايه بالبشره .
جهاز الكلارسونك نوع ميا ٢ عبارة عن فرشة تنظيف إلكترونية خاصة بالبشرة (الوجه) ، فرشتها تعتمد في حركتها على اهتزازات بمعدل ٣٠٠ هزة في الثانية ، لمده دقيقه كامله بدون توقف ، الجهاز مضاد للماء يعني عادي لو دخلتيها جو المويه كامل ، وقابل للشحن مغناطيسا من دون اي منفذ ، موقع كلارسونك يوضح انه استخدام اله كلارسونك افضل ب ٦ مرات من استخدام اليد في التنظيف البشره ، يمكن استخدامها مرتين يوميا ، تحصلونها بسيفورا وسعرها تقريبا ب٧٠٠ ريال يكثر ويقل حسب نوع الجهاز .
أولاي ريجينيريست نظام تنظيف و تشكيل للبشرة دقيق و فائق تم انتاج الجهاز مع التعاون مع خبراء واطباء الجلدية والتناسليه ، تنظف أفضل بنحو ٤ مرات ، يحضر البشرة بفعالية لنظام مكافحة علامات التقدم في السن او اي منتجات عنايه بالبشره لانه ينظف البشره مع تقشير لطيف ويزيل كل الزيوت والشوائب والمكياج بلطف مما يؤدي لامتصاص اكبر للمنتجات ، عمل فرشته يعتمد ع النظام الدوار المزود بإعدادين للسرعة ، الجهاز مضاد للماء يعني عادي لو دخلتيها جو المويه كامل ، صمم خصيصاً ليكون لطيفاً على بشرتك للإستعمال اليومي ، تحصلونها بالصيدليات والسوبرماركات بسعر ١٤٠ ريال تقريبا .
"الفرق المبدائي ان الكلارسونك فرشتها تشتغل بالهتزازات و اولاي بالدوران "
نجي لتفاصيل راح نبداء بالحجم :
الكلارسونك ( يمين في الصوره) اثقل واعرض من جهاز اولاي ، المقبض غبر قابل للانزلاق حتـى لو تبلل بالمويه ، الشكل الخارجي مافي اي منفذ (فتحه للشحن ) مضاد للماء ، فيه زراين ، زر التشغيل و زر زباده السرعه (راح اتكلم عنها تحت).
أولاي ريجينيريست (يسار في الصوره) اخف بكثير واصغر حجم من الكلارسونك ، نفس الشي مافيها اي منفذ ، ومضاده للماء ،المقبض غبر قابل للانزلاق حتـى لو تبلل بالمويه ، وبعد لها زرين تشغيل ، زر تشغيل و زر زياده سرعه .
لتظيف المقبض ازيلي رأس الفرشاة مرة واحدة في الأسبوع ، واغسلي المقبض بواسطة الماء الدافئ والصابون لإزالة أي بقايا متراكمة عليه
"افضل اولاي في الحجم لانها اخف ع اليد وماتاخذ مساحه لدرجه احطها في شنطه الميك اب الصغيره"
لتشغيل جهاز الكلاريسونيك ميا ٢ (يمين في الصوره) اضغطي ع الزر السفلي ، وراح تحسين فورا بالذبذبات وانتي ماسكه الجهاز ، الجهاز يوفر سرعتين بطيئة و سريعة ، بشرتي ناسبها السرعة البطيئة مع الفرشة الخاصة بالبشرة الحساسة ، الجهاز يعمل بشكل اتوماتيكي لمدة دقيقة (٦٠ ثانية) مقسمة لكل جزء من الوجه بحيث يفرق بينهم صوت طنين يعلمك متى تنتقلين للجزء التالي ، الدقيقه مقسمة بالترتيب كالتالي ٢٠ ثانية للذقن و الانف ، ٢٠ ثانية للجبهة ، ٢٠ مقسمة بالتساوي ١٠ ثواني لكل خد، بس مو شرط تكتفين بدقيقه احيانا اشغلها مره ثانيه عشام يصير مجموعه الوقت دقيقتين وامرره ع رقبتي ووجهي ،لتشغيل الجهاز على السرعة السريعه اضغطي على الزر العلوي ، بس انصحك ابدي اولا بالبطيئه عشان بشرتك تتعود عليها ، وتشوفين مقدار تحمل بشرتك للفرشه ، لانه كثير سببتلهم حبوب صغيره تحت الجلد بسبب قوه الجهاز مع العلم انه بعضهم اختفت الحبوب بعد كم اسبوع وبعضهم زاد الوضع سواء .
لتشغيل جهاز اولاي (يسار في الصوره) اضغطي ع الزر العلوي ، وراح تشوفين ان الفرشه بدت تدور مو تهزز زي الكلارسونك ، الجهاز يوفر ٣ سرعات عكس الكلارسونك ميا ٢ بطيئة ومتوسطه و سريعة ، اغلب الوقت استخدم المتوسطه والسريعه اذا كنت حاطه ميك اب واذا ماكنت حاطه ولا ميك اب اكتفي بالبطيئه، الجهاز يعمل بشكل متصل مو زي الكلارسوتك دقيقه ويقفل، لا هذا يشتغل لين انتي تقفلينه وماله وقت معين ، حسب طريقه استخدامك له ، تقريبا انا استخدمه بشكل دائري لمده دقيقه او اكثر بشوي ، لتشغيل الجهاز على السرعة المتوسطه و السريعه اضغطي على الزر العلوي ، على عكس الكلارسونك ماسببت اي حبوب تحت الجلد او تهيج لاغلب اللي استخدموها ومن ضمنهم انا، لانها الطف ع البشره من وجهه نظري .
"هنا مااقدر ارجح اي افضل بس عموما اولاي اخف من الكلارسونك ع البشره "
شحن كلارسونك (يسار في الصوره) يعتمد ع الكهرباء كمصدر لشحن البطاريه الداخليه للجهاز، عند الشراء ولاول استخدام لازم تشحنين الجهاز لمدة ٢٤ ساعة ، لما تشحنين الجهاز راح تلاحظين وميض في الجزء الرمادي(عند زر التشغيل) ولما يمتلي راح يتوقف هالوميض و بتلقين الاضاءة مستمرة ، يحتاج شحن كل 30 مرات استخدام .
طيب لان الجهاز مافيه اي منفذ ، فتوصيل الشاحن بالجهاز سهل جدا ، في نهايه سلك الشاحن فيه قاعده شبه دائريه نغناطيسيه بمجرد وضعه على الجهة الامامية السفلية للفرشة راح يعلق هناك و يبدا في الشحن ، بس تاكدي انه علق لانه مرره حطيته بالشحن وانا مستعجله ورجعت ولقيته ماشحن لاني حاطيت الجهاز مايل /:
شحن اولاي (يمين في الصوره) يعتمد ع البطاريه الجافه (الحجار) كمصدر طاقه للجهاز ، عند شراء الجهاز مايحتاج تستنين ٢٤ ساعه ، يمديك ع طول اول ماتركبين البطاريه تستخدمينه ، فيه شي ماحبيته هنا انك ماتعرفين متى تخلص البطاريه يعني لو فيه وميض او اشاره او عداد للطاقه، علشان تبدلين البطاريه قبل مايخلص فجاءه ، للحين الحمدالله ماخلصت البطاريه وانا استخدمه ٣-٤ مرات اسبوعيا من شهر ونص تقريبا ، الا في السفر استخدمه يوميا لانها تنضف الميك اب صح وبنفس الوقت لطيفه ع البشره .
بالنسبه لطريقه تركيب البطاريات ، اسحبي الجزء السفلي من الجهاز و تأكدي من تقفيله بشكل جيد بعد تركيب البطاريات .
لتظيف الشاحن افصلي قاعدة الشحن وامسحيها بقطعة قماش ورطبة ، لا تستخدمي المياه بكثرة.
" عيب الكلارسونك في الفيش خاصه بوقت السفر يعني تشلين هم شكل الفيش لان الشاحن برأس ثلاثي ، والاولي عيبها ان مافيه عداد طاقه يوضح مستوى الطاقه الباقيه بالبطاريه ، بس اسهل بالتنقل "
فرشه الكلارسونك (يسار في الصوره) اللي تجي معها مناسبه لجميع اانواع البشرات ، و هي مصنفة انها للبشرة الحساسة في موقع كلارسونك ، بنسيه لي ما اعتبرها للبشره الحساسه ، اعتبرها للبشره العاديه اكثر ، بس هنا المشكله كثير طلعت لهم حبوب صغيره وبعضهم راحت مع الوقت وبعضهم لا ، وللحين محد عرف السبب ناس تقول الفرشه قويه ، وناس تقول هذا طبيعي بسبب تقشير الجهاز لسطح البشره الخارجيه ، بس الاكيد انه غلط تستمرين بالتقشير وفيك بثور والحبوب ع بشرتك كذا تسببين نقل البكتريا المسببه للبثور والحب من مكان الاصابه لمكان ثاني ، يعني بالعاميه تنقلين الحبه من خد لخد .
شعيرات الفرشه قصيره جدا متفاوته بالطول تعتبر متوسطة الحجم ونعومتها متوسطه , المنطقه من حدود الشعيرات البنك فقط هي اللي تدور مع عقارب الساعه وعكسها حتى ماتأذي الجلد بالدوران الكامل وتنظف بشكل اعمق , الخط الابيض من الشعيرات على الاطراف ثابت مايتحرك ، عشان ماياذي المناطق الحساسه اذا قربتي منها مثل تحت العين ومنابت الشعر في الجبهه ، الحركه فيها دقيقه جدا ، الفرشة لها غطاء عشان تحافظ عليها من اي شي ، او وضع غير صحيح اللي يخلي الشعرات تميل ، بالنسبه لتركيب سهل جدا ، لفيها بلطف مع عقارب الساعة للتركيب ، و العكس للفك .
المفروض انك تغيرين الفرشه كل ٣ شهور وسعر الفرشه تقريبا ١٢٤ ريال ، وفيه انواع كثيره للفرش الخاصه بالاله الكلارسونك فرشه للبشره الحساسه شعرها اطول وانعم ، فرشه للبشره العاديه ، فرشه للبشره المعرضه للحبوب، وفرشه الرقيقه ، وفرشه لتنظيف العميق للمسام ، وكل الفرش تركب ع كل اجهزه كلارسونك من ميا ١ لاخر جهاز وفرته الشركه .
بالنسبه لجهاز اولاي (يمين في الصوره) فرشته مصنوعة من النايلون ، و هي لطيفة و ناعمة ع البشرة ، صمم رأس الفرشاة ليتكيف مع ثنايا الوجهه لإزالة الأوساخ و آثار الميك اب بشكل أفضل ، حتى عند منطقة الجبين و الأنف و الذقن وبنفس الوقت تكون لطيفه على البشره للإستعمال اليومي .
شعيراتها طويله وتعتبر صغيره كحجم , ناعمه جدا واعتبرها تعطي نفس نتايج الكلارسونك وافضل ، بسبب قلت شعرات الفرشه وطولها، فتناسب البشره الحساسه ، وماطلعت لي اي حبه واغلب اللي جربوها نفس الحكايه .
الفرشه تدور بالكامل عكس عقارب الساعه وتدور باتجاهه واحد ، من الافضل انك تحركين الجاهز بيدك بشكل دائري بنفس اتجاهه حركه الفرشه بس بدون ضغط بشكل خفيف ، بالنسبه لتركيب سهل بس اسحبي راس الفرشه للداخل الجهاز ، والعكس للفك .
المفروض بعد انك تغيرين الفرشه كل ٣ شهور ، سعر الفرشه ب ٣٣ ريال ، وفيه نوعين نوع الشعر (اللي بالصوره) للاستخدام اليومي ، ونوع زي الاسفنج لتنضيف العميق ، المفروض الفرشه الاسفنجيه تستخدمينها مرتين فقط بالكثير .
بالنسبه لتنظيف الفرشه بعد الاستخدام اغسليها بالمويه وخليها تنشف يابتمريرها فوق منشفه وهي شغاله ل١٠ ثواني او ليله كامله ، ومرره بالاسبوع غسليها بمويه دافيه وصابون وبعدها رشه بخاخ كحول (او منظف فرش فيله كحول)
"الفرشه حقت كلارسونك جميله اذا ناسبت بشرتك ومن رايي انك تاخذين الجهاز لحاله وتشترين فرشه للبشره الحساسه ، شعرها طويل، بالنسبه لسعر الفرشه لحاله تقريبا نفس سعر جهاز اولاي ، وهذا لازم تغيرينها كل ٣ شهور ، اما اولاي فتناسب كل البشرات وسعرها حلو بس عيبها صعبه شوي بالتنظيف زي منتو شايفين باقي الغسول لسه موجود بالفرشه "
يجي في علبه كلارسونك ميا ٢ ، جهاز الكلاريسونيك فيه منه الوان ابيض تفاحي بنك موف ، الفرشة مع غطاء شفاف يحافظ عليها، شاحن للجهاز، غسول لتنظيف الوجه حجم صغير (عينة)، علبة لحفظ فرشة الكلاريسونيك يجي بلون الجهاز .
بالنسبه للغسول سعره مبالغ فيه ولها بدايل ارخص وافضل نتايج ، سعره تقريبا ب٣٠٠ ريال
في علبه اولاي راح تحصلين ، الجهاز، فرشة تنظيف يوميه ، وفرشه للتنطيف العميق ،بطاريتين ، عينة من منظفين ، المنظف الاول لون الغطاء ازرق كريمي ينصح استخدامه مع الفرشه الاسفتجيه ، والغسول الثاني لون الغطاء احمر يميل للمقشر الخفيف بسبب الحبيبات اللي فيه .
"كلارسونك كل فتره وخاصه بعيد راس السنه تسوي خصومات ومجموعات حلوه ، عكس اولاي اللي هي ثابته وماتتغير"
------------------------------------------------------------------------------------------------------------
في النهايه راح اقولكم افضل طريقه لتنطيف ورايي للي تبي تشتري
الفرشة (سوا الكلارسونك واولاي) مصممه ع انها تعطيك التنظيف العميق وتتخلص من كل بقايا الميك اب او الافرزات داخل المسام ، يعني لو استخدمتيها في ازالة المكياج راح تخلي المكياج يدخل بشكل اكثر لاعماق البشرة وراح تحصلين على حبوب و مشاكل بدل ماتعالجينها، يعني اول لازم تزليين الميك اب باي طريقه منظف، مناديل مزيله للميك اب ، اي طريقه انتي ممرتاحه لها ، بعدين ببللي وجهك ، وبللي الفرشة شوي و اوزعي كمية بسيطة من الغسول الوجهه او المقشر على الفرشة، وبعد انتهاء الوقت اغسلي وجهك ونطفي الفرشه ، وكملي روتين عنايتك اليومي .
لاحظت مع استخدامي ان بشرتي بدت تفتح ، لانه تشيل الطبقه الخارجيه الميته من البشره وتعزز من امتصاص الكريمات العنايه بالبشره ، مع استخدامي قلت دهنية منطقة التي زون ، بشرتي صارت انعم واصفى بكثير المسام قلت ، المكياج لاحظته يطلع احلى بدون كيكي او تكتل لان البشره مصقوله ، ما لاحظت ازالة للرؤوس السوداء على الانف
اله التقشير سوا كلارسونك او اولاي او اي ماركه ثانيه لوحده ماراح يعطيك البشرة المطلوبه، بس مع العناية و الاهتمام راح تحصلين على نتايج جميلة جداً
كلارسونك عندي من ٣ سنوات ، واولاي من شهر وشي ، الاثنين يعطون نفس النتيجه حرفياا ويمكن اولاي افضل لانها ماتسبب الحبوب في البدايه ، وسعرها بسعر فرشه كلارسونك.
